CONVENIO COA CONSELLERÍA DE MEDIO AMBIENTE

O Concello asina un acordo para rematar a rede de saneamentos de Razo cun proxecto de máis de 230.000 euros

Xoves 16 de outubro do 2008

Esta actuación vén a completar os traballos que xa se están desenvolvendo para dotar a este ámbito dunha Estación Depuradora de Augas Residuais (EDAR) con capacidade para tratar a auga de 4.000 habitantes -situada en Cambrelle-, así como a instalación de colectores para os núcleos atravesados polos regatos de Barcia, Oza e Pardiñas e Santa Mariña. Agora mesmo, o investimento total que o Concello de Carballo, a través de Augas de Galicia, está desenvolvendo na zona costeira de Razo supera os 1,2 millóns de euros, aos que habería que sumar estes novos 230.000.

Hai que lembrar así mesmo, que hai dúas semanas o Consello da Xunta autorizou un investimento de 2.800.068 euros para a dotación dunha Estación Depuradora de Augas Residuais (EDAR) e de colectores xerais para a zona costeira de Baldaio, neste caso con capacidade para 2.000 habitantes. Sumando as inversións realizadas pola Xunta, a Deputación provincial e o propio Concello, o Goberno local avanza que ao remate deste mandato -incluíndo as obras nas parroquias do interior- teranse investido máis de dez millóns de euros para dotar de saneamentos e servizos de depuración á maioría dos núcleos do territorio municipal.