ENTREGA DE PREMIOS O MARTES 16 DE FEBREIRO

O Centro de Dinamización de Carballo: entre os dez finalistas autonómicos do II Concurso ‘Maiores con Iniciativa’ en Galicia

Luns 15 de febreiro do 2010

A iniciativa 'Bergantiños: pasado e presente' xorde para celebrar o 17 de maio -Día das Letras-, cando un grupo de maiores do Concello participaron nunha serie de obradoiros para facerse cuns coñecementos básicos para logo poder plasmar en Internet as súas vivencias, recordos e todo aquelo que se lles lembre ao falar da súa terra. 'Manexo do rato e do teclado' e 'Procesador de textos: Writer' foron os dous obradoiros nos que aprenderon un xeito básico e doado para transcribir os seus pensamentos nun documento de texto. Asemade, en 'Uso do escáner', aprenderon o manexo básico dun escáner e dixitalizaron os seus recordos fotográficos. Finalmente 'Achegamento ao blog' foi o obradoiro no que publicaron os seus textos e fotografías nun blog creado para que calquera que o desexe poida achegarse aos seus recordos coñecendo mellor a historia de Bergantiños.

A entrega de premios da competición autonómica ten lugar o martes 16 de febreiro ás 11.00 horas no Centro de Novas Tecnoloxías de Galicia, en Santiago de Compostela. A listaxe das seleccionadas, incluídno a carballesa, é a seguinte:

'Bergantiños: pasado e presente', Centro de Dinamización de Carballo
'Exprésache a través do teu blog, Centro de Dinamización de Sada
'Memoria de Muller en Monte Porreiro', Centro de Dinamización de Pontevedra
'Memoria dous oficios en Sada', Centro de Dinamización de Sada
'Memoria de Muller nas aldeas de Boiro', Centro de Dinamización de Boiro
'Memoria dous oficios de Boiro', Centro de Dinamización de Boiro
'Memoria de Muller en Burela', Centro de Dinamización de Burela
'Memoria de Muller de Ribadeo', Centro de Dinamización de Ribadeo
'Memoria dous oficios de Ribadeo', Centro de Dinamización de Ribadeo
'As herbas medicinais en Allariz: unha historia de recuperación e empoderamento feminina', Concello de Allariz

As tres primeiras competirán a nivel nacional, cuxo gañador será elixido por un xurado constituído por personalidades da Administración Pública e entidades privadas de ámbito estatal vinculadas coas persoas maiores e da Sociedade da Información, que se dará a coñecer nun evento que terá lugar o 25 de febreiro en Madrid. Os criterios para a valoración das iniciativas serán a súa creatividade, orixinalidade e innovación, a calidade técnica dos traballos finais, a utilidade persoal e colectiva da iniciativa, o seu alcance cuantitativo (participación) e cualitativo (repercusión e impacto social), e a súa dificultade de realización.

Galicia foi a segunda comunidade autónoma máis activa desta segunda convocatoria do certamen: das 88 candidaturas presentadas, 16 son galegas, e foron promovidas a través da rede de Centros de Dinamización da Sociedade da Información. En total, máis de 260 maiores galegos están adquirindo novas destrezas no uso de Internet e o ordenador grazas a estas accións. Desas 16 iniciativas, o Comité Técnico do Certamen elixiu as sete que, xunto con outras tres elixidas por votación popular vía Web, pasaron á final autonómica de Galicia.

O proxecto contou coa colaboración Secretaría Xeral de Modernización e Innovación Tecnolóxica da Xunta de Galicia (no marco da Estratexia Galega para a Sociedade da Información), que se adheriu ao proxecto co obxectivo de fomentar a participación no concurso dentro da rexión.