.jpg)
EN 10 ANOS A ANTENA LOCAL TEN PRESTADO SERVIZO A 500 EMPRESAS
A promoción, a creación dunha imaxe común e o comercio electrónico: retos do sector servizos de Carballo e comarca
Luns 7 de abril do 2014
Durante o acto, Marcelo Castro-Rial tamén quixo subliñar o feito de que a Antena Local de Carballo cumpre xa dez anos no seu labor de achegar ás empresas de Carballo e a súa área os servizos e programas da Cámara de Comercio. Durante esta década, prestouse servizo a máis de 500 empresas da área de Bergantiños e Costa da Morte, e a máis de 600 emprendedores, ademais de a numerosos colectivos e asociacións empresariais da zona. Así mesmo, realizáronse numerosos estudos e diagnósticos empresariais que serviron para detectar as necesidades da bisbarra. Pola súa banda, o Alcalde, Evencio Ferrero, manifestou a "preocupación continua de Carballo polos movementos comerciais", polo que avanzou que os seguintes estudos do Observatorio, que se desenvolverán ao longo de 2014, centraranse no chan comercial e na dinamización do comercio urbano. Tamén desexou que no futuro "a Antena siga a ser unha ferramenta útil para os empresarios da Costa dá Morte" e que a administración local tamén contribúa "ao impulso da actividade económica".
Respecto das conclusións dos estudos máis polo miúdo, no que respecta ao realizado sobre "Os hábitos de consumo en Carballo e a súa área de influencia", o informe identifica os retos de futuro, en canto á adaptación do sector servizos aos cambios nos hábitos de consumo de Carballo e a súa área. Estes retos xirarían en torno a tres campos de acción. En primeiro lugar, a dinamización dos negocios locais. Así, ponse de manifesto a necesidade de formación dos comerciantes en xestión do negocio, no fomento do relevo xeracional mediante un Plan de continuidade empresarial, na promoción mediante ofertas, promocións e campañas de fidelización, na creación dunha plataforma web que integre a oferta da zona e na difusión mediante campañas de publicidade. Outro dos campos de acción sería a mellora das infraestruturas. Sería recomendable a habilitación de espazos de uso común (salas de lactación, zonas wi-fi, etc.), a creación dunha imaxe comercial común (bolsas, paneis urbanos, etc.) e a posta en marcha de espazos de "showrooming" para exposicións itinerantes dos negocios locais en lugares públicos, como o Mercado Municipal, por exemplo. Por último, habería que potenciar e fomentar o uso das novas tecnoloxías e os negocios locais, con formación específica en innovación, mercadotecnia e TIC, premiando aos negocios que desenvolvan catálogos online e o comercio electrónico mediante a implantación de medios de pagamento como o moedeiro electrónico ou o pagamento por móbil.
A franquía como modelo comercial
Respecto do estudo sobre "A franquía como fórmula comercial en Carballo e a súa área de influencia", o Observatorio Socioeconómico quixo levalo a cabo porque se trata dun modelo de negocio en crecemento nos últimos anos. A realidade da franquía na bisbarra reflicte que se trata dun lugar idóneo para a expansión desta fórmula. Así, detectáronse máis de 130 negocios de franquías en Carballo e a Costa da Morte, destacando en número Carballo (con 50), Cee (con 25) e Vimianzo (con 10). En canto aos sectores, en primeiro lugar encóntrase o de finanzas e seguros (33), continúa o de alimentación e supermercados (29), telefonía (24) e as actividades de moda e tendas especializadas (19). Entre as franquías locais destaca na comarca TodoLar, con catro establecementos. O estudo considera a franquía como unha fórmula axeitada para o desenvolvemento dunha iniciativa empresarial que permite reducir os riscos da posta en marcha e favorece a súa consolidación, ao tempo que garante determinada rendibilidade.Así, o Observatorio Socioeconómico Local propón desenvolver unhas liñas xerais para axudar na creación deste tipo de negocios. En primeiro lugar, co obxectivo de fomentar o emprendemento a través do sistema de franquía é necesaria a formación e o asesoramento a emprendedores, o acceso a axudas e ao financiamento, a difusión da oferta de franquías a través de xornadas e encontros, etc. En segundo lugar, para fomentar a expansión das empresas locais a través do sistema de franquías, sería necesario facilitar formación específica e titorización a través de programas da Fundación Incyde e o fomento do Viveiro de Empresas de Bértoa como centro de apoio a emprendedores con negocios innovadores que sexan susceptibles de ser transformados en franquías.
Os interesados e interesadas poden consultar os estudos ao completo, así como as súas conclusións, en dous documentos en pdf nesta mesma nova.