.jpg)
DO 5 AO 8 DE XULLO NO XARDÍN MUNICIPAL
Sés, Manolo Rivas, Pedro Feijoo, Enma Pedreira, Eli Ríos e moitos máis nomes da cultura galega estarán na Praza dos Libros
O alcalde de Carballo agradece a implicación das librarías e da Fundación Luis Calvo Sanz para fomentar un hábito que nos fai libres
Xoves 28 de xuño do 2018 Cultura
No mesmo espazo que ocupaban ata antonte os postos máis sabedores das festas de San Xoán atoparemos a partir do xoves 5 outro tipo de alimentos, que ademais de cubrir as necesidades do corpo cobren tamén as da alma. Atún, pan, libros, música e artes plásticas integran o menú da Feira da Creatividade Cultural de Carballo, ou, o que é o mesmo, a Praza dos Libros. E para preparalo contaremos con algunhas das mellores cociñeiras e algúns dos mellores cociñeiros da cultura galega: Manolo Rivas, Pedro Feijoo, Enma Pedreira, Eli Ríos, Pablo Díaz, Anxo Moure, Paco Nogueiras, Miro Villar, Anair Rodríguez, Mamá Cabra, Milladoiro, Sés... Sen esquecer a restauradores da casa coma Xan Fraga, Rosalía Fernández Rial, Héctor Pose, Selina Otero, Beatriz Fraga ou Mercedes Queixas.
Para que non perdades detalle do programa que desvelou hoxe o concelleiro de Cultura, Marcos Trigo, podedes descargalo máis abaixo ou recollelo impreso en edificios municipais coma o Pazo da Cultura, a Casa do Concello ou as bibliotecas. E ide reservando espazo nas axendas entre o 5 e o 8 de xullo, porque van ser catro días cheos de actividades, a cada cal máis interesante.
O Concello de Carballo conta coa colaboración de libreiros/as e da Fundación Luis Calvo Sanz, que tamén estiveron representados hoxe na presentación que se realizou co mellor decorado que podiamos ter de fondo, o mercado da Praza do Concello, porque tamén a vindeira semana os libros convivirán coas feiras do xoves e o domingo.
9 librarías
Nesa primeira xornada do día 5, na que contaremos con Sés coma pregoeira, todas as persoas que merquen un libro en calquera das 9 casetas (Á lus do candil, Brañas Verdes, Demo, Ler, Punto e Coma, Roget, Phottic, Teldy e Trasgo) serán agasalladas cunha lata de atún. En principio están preparadas 250, pero, como sinalou o presidente da Fundación Luis Calvo Sanz, Luciano Calvo, “oxalá que se vendan bastantes máis, que por falta de atún non vai ser”. Os libreiros e as libreiras agradeceron a colaboración da fundación e a iniciativa do Concello de Carballo, e expresaron, por boca de Ramón Tasende, o seu desexo de que esta madrugadora feira medre do mesmo xeito que a participación do sector.
“Creo que estamos case en cifra récord de librarías participantes”, apuntou ao respecto Evencio Ferrero, o que demostra, desde o seu punto de vista, que o Concello de Carballo acertou cando apostou por un formato propio coma o da Praza dos Libros. Ao final, o obxectivo, dixo, é a promoción da lectura. “A lectura fainos libres, e polo tanto que a xente lendo aprenda a construír o futuro, a crear os seus soños, a convivir e a trazar amizades, incluso amizades de ilusión e de fantasía. Todo isto non sería posible sen as librerías e sen a colaboración da Fundación Luis Calvo Sanz”, indicou o alcalde, ademais de desexar que esta Praza dos Libros e o Verán Cultural que tamén está a chamar á porta “sirvan para reforzar a imaxe e o bo nome de Carballo”.
