O ALCALDE, EVENCIO FERRERO, ASISTIU Á SINATURA NA CORUÑA
Martes 24 de abril do 2012
O Alcalde de Carballo, Evencio Ferrero, vén de asistir na sede da Deputación da Coruña á sinatura co seu presidente, Diego Calvo, dun convenio entre o Concello e o organismo provincial polo que se realiza unha achega económica de 45.000 euros para o mantemento do Grupo Municipal de Intervención Rápida (Grumir). Este acordo formaliza a axuda económica anual da Deputación con un total de 16 concellos da provincia, incluído o de Carballo, que contan con estes grupos de intervención. A achega económica destínase fundamentalmente a sufragar os gastos de material e persoal. O total da achega provincial é de 720.000 euros, 45.000 euros por cada un dos concellos, cifra que, a pesar da redución do orzamento provincial, mantívose con respecto ao ano pasado. Os Grumir da provincia dan traballo a 224 persoas. Debido á seca que sufriu a provincia durante este ano, a Deputación decidiu adiantar a sinatura dos convenios e, ademais, como novidade, permitirá afrontar con estas cantidades gastos que se efectuaron dende o 1 de xaneiro deste ano. A finalidade dos Grumir é dar respostas inmediatas a situacións de emerxencia como incendios forestais ou urbanos, accidentes de tráfico, inundacións, primeiros auxilios, asistencias domiciliarias ou apoio en materia de seguridade viaria.
VENRES 27 DE ABRIL ÁS 21.00 HORAS
Martes 24 de abril do 2012
Catro compañías galegas, Sólodos, La Macana, Pisando ovos e Quique Peón Cía, únense para propoñer "Seisdecatro", un espectáculo que mestura planos de realidade e fantasía, momentos cotiáns que se insiren nun mundo irreal e que nos conducen por camiños inesperados. Os feitos son reais, pero teñen unha connotación fantástica, xa que algúns, ou non teñen explicación ou son moi improbables: Seisdecatro, diferentes raíces nun mesmo lugar nun mundo no que a verdade non é verdade simplemente por ser a verdade, senón pola forma en que se diga. Este proxecto foi creado por seis artistas e catro compañías e conta con músixa de Soyuz e Teresa dos Cucos, iluminación de Rubén Rayán e vestiario de Psicodelia Coruña. Erick Jiménez e Maruxa Salas (Sólodos); Rut Balbís (Pisando ovos); Alexis Fernández e Caterina Varela (La Macana); e Henrique Peón (Quique Peón Cía) conforman esta fantasía na que conflúen algúns dos bailaríns e coreógrafos máis destacados da danza contemporánea en Galicia. Todos eles aparecen en escena nesta proposta que é a última dirixida específicamente a público adulto de Primavera enDanza 2012. A duración prevista aproximada do espectáculo é de 60 minutos. O prezo da entrada é de 3,5 euros; 2,5 euros con desconto.
APROBACIÓN INICIAL DO PLAN ESPECIAL PARA ASPABER
Luns 23 de abril do 2012
A Xunta de Goberno Local reunida en sesión ordinaria vén de aprobar o expediente de contratación para o servizo de "Mantemento das portas automáticas dos edificios de titularidade municipal do Concello de Carballo e dos edificios xestionados polo Padroado Deportivo Municipal". O sistema de adxudicación é o de procedemento aberto con varios criterios e suporá o mantemento das portas do Mercado de abastos municipal, da Casa do Concello, do edificio do antigo Ambulatorio e do Pazo da Cultura, así como da Piscina Carballo Calero. O prezo do contrato é de 360 euros ao ano por cada porta automática (sendo un total de nove) o que supón un total anual de 3.240 euros. Está previsto que o acordo teña un período de vixencia de catro anos, prorrogable por outros dous máis. A orde do día supuxo tamén a aprobación inicial do Plan Especial de dotacións en solo rústico cuxo obxectivo é a regularización e ampliación das instalacións da Asociación de pais de discapacitados psíquicos de Bergantiños (Aspaber), situadas no lugar da Brea. O acordo será sometido ao trámite de información do pública durante dous meses no DOG (Diario Oficial de Galicia) e en dous xornais da provincia; a administración local solicitará os informes sectoriais necesarios da Consellería de Medio Rural e da Consellería de Medio Ambiente.
INSCRICIÓNS: ATÉ O 11 DE XUÑO
Venres 20 de abril do 2012
A administración local, a través do Padroado Deportivo Municipal organiza a II Carreira Popular 10 Km Concello de Carballo, proba oficial e homologada da Federación Galega de Atletismo. Segundo explica o Concelleiro de Deporte, Marcos Trigo, a iniciativa xorde do éxito que tivo a cita do ano pasado, tanto a nivel organizativo como de participación e de público. O obxectivo este ano é darlle continuidade á proba para que se converta nunha cita deportiva anual habitual no calendario tanto no municipio como na comarca. A organización espera que, fronte aos 750 corredores do ano pasado, en 2012 cheguen a participar arredor de 1.000, con 750 atletas en categoría absoluta e 250 en categorías inferiores. Entre as novidades desta segunda edición, hai que subliñar a incorporación da categoría junior, ou a separación en tres da dos veteranos. Está previsto entregar un total de 58 trofeos, entre os que destacan o 1º Premio para os participantes carballeses, tanto masculino como feminino; un galardón para o atleta de maior idade ou un para quen acade o récord da proba, que o ano pasado estableceu Manuel Oliver, Manute, gañador da carreira. Os interesados e interesadas en inscribirse de xeito gratuíto, ou en obter máis información sobre o regulamento da proba, poden facelo premendo aquí.
A POLICÍA LOCAL CONTARÁ CON 25 AXENTES A FINAIS DE 2012
Xoves 19 de abril do 2012
A Casa do Concello acolleu o xoves 18 de marzo unha xuntanza da Comisión Especial de Seguridade na que se dou conta do informe da Policía Local sobre as incidencias rexistradas ao longo do ano 2011. Unha das principais conclusións é que se ten producido unha tendencia á alza nos delictos contra o patrimonio, o que se achaca especialmente á situación actual de crise. Pola contra, rexistrouse un descenso nos delictos de faltas contra as persoas e nas faltas de tráfico, así como nos actos vandálicos, que teñen unha incidencia moi baixa. Así o expuxo o Inspector Xefe da Policía Local, Constantino Vázquez, nunha xuntanza na que tamén estiveron o Alcalde, Evencio Ferrero; o Concelleiro de Seguridade, Xosé Regueira; e os concelleiros de PP, TEGA e PSOE José Lado, Manuel Andrade e José Antonio Viña. Entre os feitos concretos máis destacados, subliñáronse as substraccións de cable do tendido eléctrico, polo que se fixo fincapé na necesidade de seguir realizando labores de vixilancia nas parroquias de xeito regular. Unha das principais conclusións da xuntanza é a de continuar coas reunións entre os responsables da Garda Civil e da Policía Local para coordinar actuacións e marcar estratexias co obxecto de redundar nun labor o máis eficaz posible das forzas de seguridade.
EN FAMILIA: SÁBADO 21 DE ABRIL ÁS 20.00 HORAS
Xoves 19 de abril do 2012
O sábado 21 de abril o programa Primavera enDanza céntrase nos máis cativos e cativas no ciclo En Familia coa compañía aragonesa La Mov Cia Danza que presenta "La Cenicienta", a súa última creación. Esta formación, que visita por primeira vez Carballo, ten un corte neoclásico e é a primeira vez que se enfronta a un ballet puramente clásico que conta con música de Prokofiev. Neste caso, aposta polo lado máis humano dos personaxes e por achegalos aos nosos días, o que tamén se traduce no uso de estilos que van desde o ballet clásico ata as linguaxes máis innovadoras e contemporáneas. A proposta de La Mov é unha renovada versión do conto clásico de Perrault. A través de cada un dos seus protagonistas, seres actuais e próximos á realidade, iremos coñecendo o argumento, con toda a temática que engloba este clásico: igualdade, amor, solidariedade, envexa, celos, pero tamén ilusión, soños, moralexas e toda a fantasía dos contos clásicos. Este espectáculo está destinado a cativos e cativas, aínda que tamén pode estar dirixido a todos os públicos. A cita comeza ás 20.00 horas e o prezo da entrada é de 5 € e o prezo reducido (estudantes, maiores de 65 e menores de 12) de 3,50 €.
A EDAR DE NOVÍ TEN CAPACIDADE PARA 4.000 HABITANTES
Mércores 18 de abril do 2012
O Alcalde de Carballo, Evencio Ferrero, e o de Coristanco, Antonio Pensado, veñen de formalizar a recepción da obra Colectores xerais e Estación Depuradora de Augas Residuais (EDAR) de Ardaña, situada en Noví. A partir de agora, e despois da sinatura da acta, as instalacións pasan a ser de titularidade municipal, aínda que o relevo na xestión do servizo da depuradora xa se fixera a principios deste ano. Porén, a partir de hoxe a recepción da obra completa, incluíndo a rede de colectores, é definitiva. O custe foi de 2.731.570,64 euros, financiados cunha achega dun 70 por cento por fondos europeos FEDER. As instalacións outorgan servizo ás parroquias de Ardaña, Rus e Entrecruces no Concello carballés, e á de Erbecedo no Concello de Coristanco. Aínda que a EDAR foi pensada nun principio para 2.000 habitantes, unha mellora no proxecto fai que agora teña capacidade para 4.000 habitantes equivalentes. Segundo explican os técnicos, a auga dos colectores elévase por gravidade e a partir de aí realízase na EDAR a separación de sólidos e de elementos en suspensión para proceder finalmente ao tratamento co reactor biolóxico. Os alcaldes estiveron acompañados durante o acto por representantes de CRC, empresa responsable dos traballos; de Augas de Galicia; e dos Concelleiros Luís Lamas, de Carballo, e Clarisa Couto, de Coristanco.
VENRES 20 DE ABRIL A PARTIRES DAS 21.00 HORAS
Martes 17 de abril do 2012
O venres 20 de abril continúa a programación de Primavera enDanza coa compañía vasca de Natxo Montero, que presenta "Carni di primà qualitá", unha proposta arriscada e sen artificios, de corpos en disputa permanente que, a través dunha técnica poderosa, mostran a contundencia da linguaxe física como vehículo para expresar unha realidade implacable. Un espectáculo único con dous bailaríns excepcionais no que o público nunca queda indiferente e que plasma momentos e situacións desexadas e non desexadas que nos suceden a todos na vida. Natxo Montero_Danza é unha nova compañía que nace en Bilbao en 2008. Esta é a súa segunda creación, coa que participou en importantes festivais de danza e coa que gañou o 2º premio no Certame Coreográfico de Madrid do ano 2009. Nesta peza o corpo (des)organízase doutro xeito xa que a pel, a carne e o movemento son os elementos que interactúan. Non hai xénero, só hai choques, rozamentos, contacto, escorregamentos de pel a velocidades e intensidades distintas, que xeran movemento e producen o son a través do contacto. Este espectáculo comeza ás 21.00 horas e o prezo da entrada é de 3,50 €, mentres que o prezo reducido é de 2,50 €.
EN NOVE PARROQUIAS DO CONCELLO
Venres 13 de abril do 2012
A empresa Telefónica-Movistar informa de que vén de poñerse en servizo unha nova infraestrutura de telefonía e banda ampla móbil 3G no Concello de Carballo que dará cobertura, de forma adicional ás que xa están en funcionamento, aos núcleos de poboación de Altiboa, Barreiro, Bas, Bouzas, Castro, Ceide, Chacin, Constenla, Fraga, Garrida, Goiáns de Arriba, Igrexa, Longras, Loureiro, Maroas, Noví, Oza da Estrada, Pallas, Pedra Furada, Picho, Picoto, Piñeiro, Pontenova, Ramil, Reboredo, Regueira de Abaixo, Regueira de Arriba, Saíñas, San Mamede, Telleira, Torre, Troián de Arriba, Troián do Medio, Vilanova, Vilardefrancos e Vivente (parroquias de Ardaña, Goiáns, Sofán, Sísamo, Berdillo, Artes, Noicela, Rus e Oza). Esta actuación foi realizada por Telefónica-Movistar dentro do Plan de Banda Ampla 2010-2013 da Xunta de Galicia e ofrece acceso inmediato a un amplo conxunto de servizos de Internet, ademais de servir para acometer a modernización empresarial dos negocios da zona e mellorar as súas plataformas tecnolóxicas. Os interesados e interesadas en contratar a conexión, poden facelo en calquera punto de venda de Telefónica-Movistar de Carballo onde poderán obter información polo miúdo sobre a conexión e resolver calquera dúbida que poidan ter.
O XOVES 19 DE ABRIL NO PAZO DA CULTURA
Venres 13 de abril do 2012
A Concellaría de Cultura que dirixe Mar Eirís informa de que o xoves 19 de abril o público carballés terá a oportunidade de gozar da música dun dos meirandes gaiteiros do mundo, o bretón Patrick Molard que, aproveitando unha pequena xira que está a facer por Galicia, recala en Carballo despois das xestións realizadas dende o Concello. Este mestre da gaita escocesa, irlandesa e bretona ofrece nos seus recitais unha fusión arredor da música destes países e de Galicia, nutríndose o seu repertorio de temas tanto tradicionais como de autor e, cando a ocasión o permite, de piobaireachd, un xénero musical das Highlands escocesas, de longa duración. Trátase dunha música sabia, de tradición oral, elaborada hai catro séculos nas illas Hébridas. É o son ancestral de Escocia nunha música envolvente e fascinante que a miúdo se compara ao Raga hindú, esquemas melódicos de improvisación, baseados nunha colección dada de notas e patróns rítmicos característicos. Patrick Molard é un artista que ten participado, xa como compoñente de diferentes formacións, xa como músico en solitario, na gravación de máis de 50 discos e CDs. O concerto é no auditorio do Pazo da Cultura e a entrada é de balde. A cita é a partir das 21.00 horas.
O PRÓXIMO CURSO TERÁ CAPACIDADE PARA 164 NENOS E NENAS
Venres 13 de abril do 2012
A nova Escola Infantil A Braña da capital municipal carballesa incrementa nun 160 por cento a oferta de prazas públicas para nenos e nenas de 0 a 3 anos no municipio de Carballo coa creación de 103 novas matrículas para o curso 2012-2013. O Alcalde de Carballo, Evencio Ferrero; o xerente do Consorcio Galego de Servizos de Igualdade e Benestar, Roberto Rodríguez; o presidente da Deputación da Coruña, Diego Calvo; e a Conselleira de Traballo e Benestar, Beatriz Mato, coñeceron e visitaron hoxe as instalacións durante o acto de inauguración do novo servizo, que entrou en funcionamento o 20 de marzo deste ano. O Alcalde de Carballo quixo agradecer a presenza das autoridades e especialmente a colaboración da Deputación, que achegou preto de 500.000 euros dos aproximadamente 700.000 que custou a obra. Subliñou o feito de que "nun ano de altísimas dificultades seguimos poñendo servizos en funcionamento como o Centro de Día e agora a nova Escola Infantil". Por último, Ferrero lembrou a importancia de que se sigan a dar pasos "para contribuír á conciliación da vida laboral e familiar". Á súa vez, Beatriz Mato amosou a súa satisfacción por "ter a oportunidade de facilitarlle a vida a moitas familias" e resaltou que "a cooperación e a coordinación das distintas administracións é máis importante que nunca na actual conxuntura para garantir o funcionamento dos servizos".
FORON IDENTIFICADOS 23 DOS 30 MARCOS ESTUDADOS
Mércores 11 de abril do 2012
A Casa do Concello de Carballo vén de acoller unha xuntanza da Comisión de deslinde dos municipios de Carballo e A Laracha, a terceira despois de dúas celebradas nas dependencias larachesas, na que se avanzou notablemente nos traballos para establecer as fronteiras entre ambos concellos. Hai varios anos que os representantes municipais de ambas partes acordaron poñerse a traballar para chegar a un acordo que está cada vez máis próximo. Así, na reunión celebrada hoxe, de más de dúas horas de duración, repasáronse os documentos que marcan os límites dos municipios e lograron identificarse 23 dos 30 marcos nos que existían dúbidas, despois de que se traballase para recoñecer cada punto. Para identificar definitivamente os sete que faltan, a comisión acordou manter unha nova xuntanza o mércores 25 de abril, neste caso realizando traballo de campo nos mesmos lugares onde están situados os marcos. Segundo informa o Concelleiro de Obras e Servizos, Luís Lamas, os marcos que non están claros están situados nas parroquias de Sofán (3), Bértoa (2), Berdillo (1) e Noicela (1). Unha vez aclarados estes puntos, manterase unha última reunión na que se fará efectivo o acordo e a partir da que se elaborará unha Acta de deslinde de mutuo acordo.
.jpg)