SÁBADO 14 DE ABRIL ÁS 21.00 HORAS
Martes 10 de abril do 2012
O sábado 14 de abril a compañía galega Entremáns chega a Carballo para presentar "Blondy's Coffee", primeira actuación para publico adulto do programa Primavera enDanza 2012. Trátase dunha peza soa para dúas mulleres, un espectáculo no que dúas bailarinas recrean nove escenas acompañadas de imaxes audiovisuais que axudan a afondar na historia e descubrir os personaxes, a coñecer as súas intrigas e viaxar ao interior que as habita. Son dúas persoas sumidas no tedio e que se refuxan en pasatempos na procura de novas emocións que lle devolvan a súa propia natureza. Un hábitat no que atoparse elas mesmas coas súas miserias e as súas grandezas. "Blondy's Coffee" ten o seu xerme na exposición "Evanescencias" de Román Montesinos e Kirenia Martínez. As texturas, posturas e símbolos que se engaden ao corpo feminino espido convértense en movemento na peza coreográfica. Entremáns é unha compañía de pequeno formato, residente en Galicia e que conta xa con cinco anos de traxectoria. A cita é no auditorio do Pazo da Cultura ás 21.00 horas. A duración prevista do espectáculo é de 50 minutos e o prezo da entrada 2,5 euros (2 € prezo reducido).
A NORMATIVA DEBE DE SER APROBADA EN PLENO
Mércores 4 de abril do 2012
Os voceiros dos grupos políticos municipais de Carballo mantiveron hoxe unha xuntanza para expoñer os principais puntos do novo Regulamento Municipal do Mercado de Carballo. Segundo explica a Concelleira de Feiras e Mercados, Milagros Lantes, trátase dunha norma tipo que recolle moitos dos puntos do anterior, aínda que actualizando certos elementos como o canon ou as taxas. Así mesmo, a normativa conta con algunhas novidades, como o establecemento dunha sinalización e un equipamento común por gremios nos postos da praza de abastos. Así, no caso das carnicerías os carteis irían en vermello, nas peixerías en azul, nas panaderías e queixerías en amarelo ou nas froitarías en verde. A sinalización estaría complementada cun vestiario para os praceiros acorde, nas mesmas cores que a sinaléctica. Outra das novidades refírese ao apartado de promoción e publicidade. Así, recóllese a creación dun apartado na páxina web municipal debidamente sinalizado con información relativa aos postos, como por exemplo os produtos que teñen á venda, se realizan reparto a domicilio, promocións que queiran poñer en marcha, etc. Despois de ser exposto ante todos os grupos municipais, o novo regulamento deberá ser aprobado nunha sesión do pleno da corporación.
ENTRE O 14 E O 29 DE ABRIL
Martes 3 de abril do 2012
O ciclo Primavera enDanza cumpre este ano unha década facéndose un oco na programación cultural estable do Concello de Carballo e sendo unha cita "relevante non só pola calidade, senón tamén pola escaseza deste tipo de propostas na escea galega", segundo explica a Concelleira de Cultura, Mar Eirís. É un dos programas de danza contemporánea máis antigo de Galicia e tamén un dos poucos que existen máis aló das grandes cidades. Ten lugar habitualmente en abril coincidindo coa celebración, o 29 deste mes, do Día Mundial da Danza. Dende a Concellaría de Cultura queren subliñar que este tipo de espectáculos é recomendable para persoas interesadas, non só na danza, senón tamén nas artes escénicas en xeral e no mundo audiovisual, o teatro ou a música. Mar Eirís tamén sinala que non se trata de espectáculos "minoritarios" ou "exclusivos", senón dirixidos a todos os públicos co obxectivo de achegar a danza contemporánea aos espectadores e co desexo de que estes primeiros dez anos sexan só o xerme doutras moitas primaveras en danza. A cita conta con seis espectáculos que se representan no auditorio do Pazo da Cultura entre o 13 e o 29 de abril. A venda de bonos e reserva de entradas pode realizarse a partires do luns 9 de abril.
A XUNTA LOCAL CELEBRARASE NO MES DE MAIO
Luns 2 de abril do 2012
O Alcalde de Carballo, Evencio Ferrero, vén de entrevistarse co Subdelegado do Goberno na Coruña, Jorge Atán Castro, nunha xuntanza na que tamén estiveron presentes o Concelleiro de Xestión Municipal e Seguridade, Xosé Regueira, e o Sarxento da Policía Local, Constantino Vázquez. Durante a reunión, falouse das principais problemáticas que existen no municipio en materia de seguridade. Entre elas, hai que subliñar os esforzos para reducir os roubos de cable de cobre, os últimos nas parroquias de Ardaña ou Rus, que teñen experimentado un repunte nas últimas semanas. Así mesmo, expúxose a posibilidade de incrementar a vixilancia na zona costeira durante o período estival, para aumentar a seguridade das persoas que adoitan veranear en Razo e Baldaio. Outro dos asuntos abordados refírese a reforzar no futuro aínda máis a colaboración que existe entre a Policía Local e a Garda Civil, e incluso cos axentes da Policía Nacional. Regueira informa de que está previsto celebrar a próxima Xunta Local de Seguridade a mediados do mes de maio, á que é moi probable que asista por primeira vez o Comisario da Policía Nacional precisamente para redundar nas políticas de colaboración das forzas de seguridade.
PROTECCIÓN CIVIL ADVIRTE DA AUSENCIA DO SERVIZO DE SOCORRISMO
Venres 30 de marzo do 2012
A empresa concesionaria do servizo de 'Limpeza de praias do municipio de Carballo', Eulen SA, está realizando estes días labores de limpeza e acondicionamento dos areais do municipio con motivo das vacacións de Semana Santa. Xa se tiña realizado unha limpeza durante o inverno para eliminar as consecuencias dos temporais, e agora está traballando de novo unha máquina cribadora para recoller os residuos sólidos e deixar a area de Razo, Baldaio e Pedra do Sal en perfecto estado. As prediccións de MeteoGalicia indican que, a pesares de que descenderán un pouco as temperaturas, as probabilidades de que faga sol nos primeiros días de Semana Santa son dun 70 por cento, polo que se espera unha elevada afluencia ás praias. Porén, os responsables de Protección Civil de Carballo queren lembrar aos veciños e veciñas que nestas datas non está dispoñible o servizo de socorrismo e vixilancia nos areais do Concello, polo que reiteran que o baño non é recomendable. Ademais, tampouco están habilitadas e sinalizadas as zonas aptas para o baño en cada praia. Por estes motivos, Protección Civil recomenda que os usuarios e usuarias dos areais teñan a máxima precaución á hora de meterse na auga.
ENTRE AS 20.30 E AS 21.30 HORAS NO MARCO DUNHA CAMPAÑA MUNDIAL
Mércores 28 de marzo do 2012
O Concello de Carballo vén de adherirse á campaña da "Hora do planeta", promovida por WWF/Adena, unha entidade creada en 1968 que traballa a prol da conservación da natureza. Esta iniciativa xorde como unha chamada á acción cidadá que ten o obxectivo de demostrar que a actuación conxunta de persoas de todo o mundo pode server para ofrecer alternativas ao cambio climático. Dende hai seis anos, centos de millóns de persoas de todo o globo, empresas, gobernos e centros educativos loitan a prol do aforro enerxético a través desta iniciativa. A cita é o sábado 31 de marzo entre as 20.30 e as 21.30 horas, cando se apagarán as luces de monumentos, rúas, empresas e fogares por todo o planeta para tratar de concienciar sobre a conservación do medio ambiente. No caso de Carballo, está previsto apagar o alumeado público na contorna da Praza do Concello e anímase aos veciños e veciñas a que colaboren dende as súas vivendas reducindo o consumo enerxético durante esa hora. O ano pasado, máis de 5.000 cidades de 135 países apagaron as súas luces, enviando unha clara mensaxe: os xestos simbólicos poden xerar grandes cambios na busca de que o compromiso global se manteña ao longo de todo o ano.
VENRES 30 DE MARZO ÁS 21.00 HORAS
Mércores 28 de marzo do 2012
O programa dos Venres Culturais chega á súa fin da man da compañía Teatro do Atlántico que presenta a súa última produción "E.R. (Algún día traballaremos xuntas)", un espectáculo que vén de estar nominado aos Premios María Casares 2011 á mellor adaptación e mellor dirección e que conta, así mesmo, con dúas nominacións á mellor actriz protagonista. Un espectáculo teatral que os amantes do teatro no deben perder a oportunidade de ver. Teatro do Atlántico escolle a tres veteranas actrices galegas de dilatadas carreiras profesoinais xunto a unha máis nova pero tamén de ampla experiencia (Manuela Varela, María Barcala, Luísa Merelas e Susana Dans), para poñer en escea esta obra dun dos dramaturgos de referencia do teatro catalán contemporáneo Josep María Benet, que foi Premio Nacional de Literatura Dramática en 1994 con este texto. Esta compañía galega acada con este espectáculo a súa produción número vinte e sete, sendo unha das compañías máis consolidadas do panorama teatral galego. A cita é no auditorio do Pazo da Cultura a partires das 21.00 horas. A duración prevista do espectáculo é de 110 minutos e o prezo da entrada de 3,5 € (2,5 € con desconto).
UNANIMIDADE PARA A SALA DE EXPOSICIÓNS ALBERTO GENDE
Martes 27 de marzo do 2012
A terceira sesión plenaria celebrada en Carballo no mes de marzo supuxo a aprobación do Convenio de adhesión do Concello á Axencia de Protección da Legalidade Urbanística (APLU). O acordo supón a atribución a esta entidade das competencias municipais de inspección, supervisión, sanción e restablecemento da legalidade urbanística nos supostos recollidos da LOUGA, Lei de Ordenación Urbanística e Protección do Medio Rural de Galicia. O motivo desta adhesión é o de que o Concello se una a unha plataforma que está a disposición dos municipios para velar polo cumprimento da legalidade. Trátase dun ente público consorcial que propón o desenvolvemento común por parte da Administración autonómica e os municipios que voluntariamente se integren nela de funcións de inspección urbanística. Para poder formar parte da APLU, a administración local debe achegar 5.050 euros ao ano (50 euros por cada núcleo de poboación), ademais do 50 por cento dos ingresos percibidos polas sancións urbanísticas que se deriven da actuación da APLU. O acordo debe recibir agora a aprobación do Consello da Xunta, aínda que, en caso de disconformidade, o Concello pode retirarse deste organismo en calquera momento.
OPTAN A TRES PREMIOS PARA A ELABORACIÓN DE SEIS ESCAPARATES
Luns 26 de marzo do 2012
Un total de 21 establecementos comerciais de Carballo participan no Concurso de Escaparatismo do II Plan de Mellora da Imaxe Comercial do Concello incluído no Plan de Reactivación e Dinamización Empresarial que se está a desenvolver dentro do proxecto Fórum Carballo. Este concurso, que pechou o seu prazo de inscrición o venres 23 de marzo, ofrécelles a posibilidade aos premiados de que profesionais especializados realicen a montaxe dos seus escaparates en distintos momentos ao longo do ano. Esta iniciativa enmárcase dentro das actuacións do Concello, a través da Concellaría de Promoción Económica, para fomentar actuacións que dinamicen o comercio local. O certame ten como obxectivo complementar o Plan de Mellora da imaxe Comercial, así como premiar o esforzo dos establecementos participantes. Concederanse tres premios para a elaboración de 6 escaparates, incluíndo decoración, panelado e montaxe, e distribuiranse do seguinte xeito aos proxectos que obteñan unha maior puntuación segundo o ditame do xurado: Primeiro premio, elaboración de 3 escaparates; Segundo premio, elaboración de 2 escaparates; Terceiro premio, elaboración de 1 escaparate.
O ALCALDE DE CARBALLO ESTIVO NO ACTO DE INAUGURACIÓN
Luns 26 de marzo do 2012
O CEIP Canosa-Rus xa conta cunha renovada biblioteca nunhas instalacións que foron reformadas no marco do Plan de mellora de bibliotecas escolares en centros públicos non universitarios (PLAMBE). As axudas serviron para cambiar o chan e o mobiliario, ademais de para repintar a biblioteca, dotala de colorido e actualizala coas novas tecnoloxías. O Alcalde de Carballo, Evencio Ferrero, así como a Concelleira de Educación e Cultura, Mar Eirís, asistiron ao acto de inauguración no que tamén estivo o Xefe Territorial de Educación, Indalecio Cabana Leira, representantes do Concello de Coristanco e a directora do centro, Lucía Galego. Galego quixo agradecer a colaboración tanto dos concellos de Carballo e Coristanco no seu traballo a prol do centro, como da Xunta e das nais e pais que tanto contribúen ao desenvolvemento dos proxectos escolares. Indalecio Cabana tamén quixo subliñar o traballo que realizan os concellos en colaboración coa comunidade educativa, e resaltou a importancia de que existan espazos como o inaugurado hoxe, xa que "se a aula é o corazón do ensino, a biblioteca como mínimo serían os pulmóns".
SOLICÍTASE UNHA AXUDA PARA CONTRATACIÓNS PARA O GRUMIR
Luns 26 de marzo do 2012
A Xunta de Goberno Local vén de aprobar, nunha sesión ordinaria, as bases para a convocatoria de varias subvencións relacionadas coa Concellaría de Cultura e Educación. Así, reciben luz verde as bases para solicitar as axudas para a realización de viaxes escolares en 2012, unhas subvencións que teñen por obxectivo colaborar coas escolas ou colexios de 2º ciclo de Educación Infantil e/ou Primaria e Institutos de Educación Secundaria para a realización de viaxes de carácter cultural. O Concello pretende contribuír á realización de actividades fóra do medio escolar, complementando as actividades académicas e ofrecendo a posibilidade de coñecer novos lugares e recursos. Dependendo do número de alumnos/as as axudas varían de 120 a 660 euros por centro. Recibiu tamén luz verde a convocatoria de subvencións para as ANPAS (Asociacións de Nais e Pais) para a realización do programa de actividades educativas do ano 2012. O obxectivo das axudas é contribuír ao complemento das actividades académicas a través das ANPAS, que realizan un importante labor de dinamización cultural. Segundo o número de alumnos/as do centro ao que perteneza a ANPA, as axudas poden ir de 300 a 700 euros.
A EXPOSICIÓN: NO PAZO DA CULTURA ATÉ O 30 DE ABRIL
Venres 23 de marzo do 2012
A edición número XIV do Certame Fotográfico Xosé Manuel Eirís caracterízouse pola elevada presenza de participantes doutras comunidades, como Cataluña, Castela León ou Madrid. A entrega de premios tivo lugar na sala da baixocuberta do 3º andar do Pazo da Cultura, onde permanecerá unha mostra coas 85 mellores obras presentadas até o luns 30 de abril. No que vai de vida do certame, teñen sido premiadas xa 52 obras, e á edición de 2012 téñense presentado 211 imaxes de 91 fotógrafos/as. O Alcalde, Evencio Ferrero, quixo felicitar aos gañadores e ao xurado, que "ten un labor cada vez máis difícil". Agradeceu a presenza do segundo premiado, José Luis Morales, chegado dende Madrid, e tamén a do gañador, o pontevedrés Alberto Pousa Torres, que vén de recibir un premio en Nova York. Ferrero tamén tivo verbas para Xosé Manuel Eirís,"persoa cunha grande sensibilidade artística" e que permanece na memoria de todos, e para o artista recentemente desaparecido Alberto Gende. Feliciano Eirís, en representación da familia de Xosé Manuel, quixo agradecer ao Concello, ao xurado e aos participantes a súa contribución e subliñou a afección especial que sempre tivo Eirís pola fotografía. Os interesados/as en visitar a mostra, na que se inclúen as obras premiadas, poden facelo en horario de 18.00 a 21.00 horas.
.jpg)