REDE XIANA
Martes 2 de marzo do 2010
María Manso Cid, Concelleira de Formación, Emprego e Participación Veciñal informa de que o mércores 3 de marzo ás 12.00 horas ten lugar no salón de plenos do Concello de Carballo a entrega de diplomas do curso -na imaxe o día da súa presentación- de Atención Sociosanitaria a Persoas Dependentes en Institucións Sociais incluído na Rede Xiana (Xestión Integral, Accesibilidade, Novas Tecnoloxías e Adaptabilidade no mercado laboral galego). Está prevista a presenza no acto do Alcalde, Evencio Ferrero. A Deputación da Coruña, no ano 2009, seleccionou ao Concello de Carballo para ser entidade sede e impartir o cursiño destinado a alumnas desempregadas da comarca de Bergantiños e de Arteixo pertencentes aos sectores con maior taxa de desemprego.
REPARTÍRONSE 1.850 EUROS EN GALARDÓNS
Martes 2 de marzo do 2010
Unha obra do fotógrafo Marcos Rodríguez vén de ser elixida como gañadora do XII Certame Fotográfico Xosé Manuel Eirís, que repartiu un total de 1.850 euros en premios nesta edición. O título da imaxe que quedou en primeiro lugar é 'Toda unha vida', e, neste caso, o galardón consiste da dotación de 700 euros e un diploma acreditativo O segundo premio, dotado con 450 euros e un diploma, recaeu na fotografía que leva por título 'Explosión de cor', presentada por Antonio Iglesias Núñez. O Premio Especial Carballo, que distingue as imaxes centradas no municipio, está dotado con 450 euros e diploma, e nesta ocasión recae na fotografía 'A ponte', presentada por José López Pérez. Por último, o xurado decidiu conceder un Accésit de 250 euros á fotografía 'La ventana', de Ángel Pérez de León. Esta edición ten rexistrado un total de 78 participantes.
XUNTA DE GOBERNO LOCAL
Luns 1 de marzo do 2010
A Xunta de Goberno Local vén de adxudicar de xeito definitivo a obra de 'Urbanización do polígono 27' da capital municipal, situado na contorna da rúa Perú e que supón, así mesmo, a dotación de servizos para as rúas Chile, Bos Aires e Pontevedra. A principios de febreiro comezaron os traballos correspondentes aos propietarios dos terreos. Agora, e despois da adxudicación definitiva a Construcciones Ramón Vázquez y Reino SL por 130.036 euros, sumaranse tamén as melloras a cargo da Administración Local. Os traballos implican a instalación de canalizacións e alumeado, a pavimentación do firme e a creación de beirarrúas, do mesmo xeito que se ten feito xa no polígono 26, situado ao seu carón, e que supuxo a mellora do primeiro treito da rúa Perú. O prazo de execución previsto é de nove meses.
O SORTEO DE PREMIOS É O MARTES 2 DE MARZO
Venres 26 de febreiro do 2010
O domingo 28 de febreiro remata a I Ruta do Pincho de Inverno, organizada pola Concellaría de Promoción Económica e na que teñen participado e colaborado un total de 11 locais de hostalería de Carballo. A iniciativa vénse realizando todos os sábados e domingos dende o pasado 30 de xaneiro. Aínda, pois, esta fin de semana, os establecementos que colaboran coa proposta ofrecen o sábado e domingo de 13.00 a 15.00 horas e de 20.00 a 22.00 pinchos de balde coas consumicións. O único requisito é que os pinchos sexan elaborados, creativos, únicos e diferentes. Como ata o de agora, e como se fixo tamén coa I Ruta do Pincho de Verán, a organización quere seguir recollendo as impresións dos veciños e veciñas que o desexen. Para iso pón á súa disposición o seguinte blog: <www.blogoteca.com/depinchosporcarballo>.
AS ESPECIES EMPREGADAS SON AMENEIROS E BIDUEIROS
Venres 26 de febreiro do 2010
A Concellaría de Servizos que dirixe Luís Lamas informa de que durante os últimos días a Brigada de Medio Ambiente ten plantando arredor de 200 árbores de ribeira nas marxes do río Anllóns ao seu paso pola capital municipal. O tramo obxecto da actuación é o Paseo que transcorre entre o parque do Anllóns e o Muíño do Quinto, en que se actuou na marxe esquerda do río; e entre o Muíño do Quinto e a Ponte de Bértoa, en que se ten actuado nas dúas marxes. O obxectivo da medida é o de substituír o elevado número de exemplares caídos tanto durante os fortes temporais que teñen asolado o municipio, como os falecidos por causas naturais. Hai que subliñar que nas últimas semanas teñen desaparecido moitos ameneiros a causa dunha praga presente en toda a comarca.
VENRES CULTURAIS
Xoves 25 de febreiro do 2010
O venres 26 de febreiro, dentro do programa dos Venres Culturais 2010, o auditorio do Pazo da Cultura acolle a representación de 'Palabras Encadenadas' da compañía ceense Talía Teatro que, nesta ocasión, propón un thriller psicolóxico con moito suspense e tensión dramática, escrito polo dramaturgo español contemporáneo Jordi Galceran e protagonizado nesta versión por Toño Casais e María Ordóñez. Esta montaxe supón xa a estrea número 26 da compañía dirixida por Artur Trillo, que enfoca as súas producións tanto para adultos como para nenos. Este espectáculo teatral, que conta coa colaboración do Agadic (Axencia Galega das Industrias Culturais), comeza ás 21.00 horas. A entrada é de 3,5 euros; o prezo especial con desconto é de 2,5 euros. A taquilla estará aberta de 19.30 a 21.00 horas.
O IMPORTE É DE 89.500 EUROS
Mércores 24 de febreiro do 2010
O Alcalde de Carballo, Evencio Ferrero, vén de asinar hoxe co Conselleiro de Medio Rural, Samuel Juárez Casado, o convenio para o desenvolvemento de Proxectos Estratéxicos de Infraestructuras no Medio Rural (PEIM Rural) 2009-2010. Este acordo subscribiuse no Concello da Baña ao mesmo tempo que con outros trece concellos da provincia e supón o arranxo e mellora de catro camiños rurais do municipio carballés: o camiño de Guitoi-A Contía, na parroquia de Sofán; o camiño O Picoto-Ponte de Quintela, en Artes; o de Aseñado a Fonte de Cobo, en Berdillo; e o camiño Castrillón-Agramaior, na parroquia de Lema (na imaxe). O importe total das actuacións previstas no Concello de Carballo chega a 89.552,39 euros, do total de 1,2 millóns que a Consellería ten previsto investir entre os 14 concellos.
APROBADO O INVENTARIO DE BENS, QUE CHEGA A 258 MILLÓNS DE EUROS
Martes 23 de febreiro do 2010
A sesión plenaria ordinaria do mes de febreiro, celebrada o luns 22, sacou adiante dous acordos que impulsan a creación dunha Subestación Eléctrica no Parque Empresarial de Bértoa. Trátase, por unha banda, da Depuración física e xurídica de parcelas de titularidade municipal situadas no polígono para aumentar a fronte dos terreos nos que se instalará o novo servizo, situados no entorno do actual circuíto de campo a través do polígono industrial. A parcela pasa dos 1.550 metros cadrados previstos inicialmente a ter 1.900. Por outra, o acordo tamén inclúe, a través dunha permuta, a cesión ao Concello por parte de Xestur duns terreos de similar valor (uns 110.000 euros) e cunha superficie de 1.200 metros cadrados situados na ampliación do polígono. O obxectivo da nova subestación é garantir que as empresas conten cun subministro eléctrico suficiente para cubrir as súas necesidades.
OBRAS E SERVIZOS
Luns 22 de febreiro do 2010
O Concelleiro de Obras e Servizos, Luís Lamas, informa de que, segundo o plan de execución das obras de mellora da Avenida de Malpica da capital municipal, ao longo desta semana principiarán os traballos para a instalación do pavimento nas beirarrúas desta vía. Os operarios están traballando na marxe dereita da rúa, na que xa teñen instalado os servizos, entre os que se atopan os de saneamento e canalización de fecais e pluviais, ou os de electricidade. Agora é a quenda da instalación das baldosas nas beirarrúas, unhas obras que comezarán á altura da confluencia da Avenida de Malpica coas rúas Perú, Ponte e Luís Calvo. Unha vez que se teña rematado coa marxe dereita, está previsto que se realicen o mesmo tipo de melloras na outra marxe, para rematar os traballos coa instalación dun novo firme na vía e coa colocación do mobiliario urbano.
O CENTRO DE DÍA: EN MARCHA NO SEGUNDO SEMESTRE DE 2010
Venres 19 de febreiro do 2010
O Concello buscará un financiamento alternativo para poder sacar adiante o proxecto para construír unha segunda Escola Infantil para Carballo en 2010 ante a imposibilidade do Consorcio Galego de Servizos de Igualdade e Benestar de garantir este financiamento. Así se desprende dunha xuntanza mantida hoxe entre o Alcalde de Carballo, Evencio Ferrero, e a Concelleira de Servizos Sociais, Dores Silveira, co Xerente do Consorcio Galego, Roberto Rodríguez, convocada precisamente para falar da situación deste proxecto. En todo caso, o Consorcio sí que se compromete a incluír as futuras instalacións, unha vez rematadas, na súa Rede Pública e a garantir os gastos de mantemento do novo servizo a partir do ano 2011. Nestes momentos todo indica que a redacción do proxecto de obra desta actuación estará rematado e dispoñible o próximo mes de marzo.
O INVENTARIO DE BENS MUNICIPAIS ESTÁ VALORADO EN 258 MILLÓNS
Venres 19 de febreiro do 2010
A sesión plenaria ordinaria do mes de febreiro que se celebra o luns 22 inclúe entre os asuntos da orde do día a aprobación do acordo de permuta con Xestur Coruña SA para a construción dunha subestación eléctrica no Parque Empresarial de Bértoa. O obxectivo desta actuación é garantir que as empresas instaladas no polígono e as que se implanten no futuro conten cun subministro eléctrico suficiente para cubrir as súas necesidades. O acordo inclúe unha lixeira modificación na superficie da parcela, que pasa dos 1.550 metros cadrados previstos inicialmente a ter 1.900, co que se aumenta a fronte do solar, situado no entorno do actual circuíto de campo a través do polígono industrial. O acordo inclúe, a través da permuta, a cesión ao Concello por parte de Xestur duns terreos de similar valor (uns 110.000 euros) e cunha superficie de 1.200 metros cadrados na ampliación do polígono.
MATRÍCULA PREVISTA DE 291 NENOS EN INFANTIL EN 2010
Xoves 18 de febreiro do 2010
O Alcalde de Carballo, Evencio Ferrero, e a Concelleira de Educación, Mar Eirís, veñen de entrevistarse coa Xefa Territorial de Educación, María Teresa Villaverde Pais, co obxectivo de transmitirlle as demandas do Concello nesta materia, así como as actuacións previstas pola Administración Local para o ano 2010. Un dos principais obxectivos é acadar que se aborde a ampliación do CEIP Bergantiños da capital municipal para poder darlle resposta aos inminentes problemas de escolarización que se presentan para o próximo curso 2010/2011. Así, está prevista a matriculación de 291 nenos de 3 anos, dos que case as dúas terceiras partes (un total de 211) corresponden ao casco urbano. A Xefatura Territorial adquiriu o compromiso de estudar a ampliación do CEIP Bergantiños.
.jpg)