DOMINGO 21 DE FEBREIRO ÁS 18.00 HORAS
Xoves 18 de febreiro do 2010
Despois da animada paréntese do Antroido, continúa o programa dos Venres Culturais 2010, nesta ocasión co ciclo 'En familia', dirixido especialmente aos máis cativos e cativas. A cita é o domingo 21 de febreiro co espectáculo de monicreques 'Rosalía, a pulga que escribía', que desenvolve a compañía galega Galitoon ás 18.00 horas no Pazo da Cultura. A obra, de 50 minutos de duración, conta a historia de Rosalía, unha pulga moi, moi pequena que escribe cartas. Os interesados e interesadas en acudir á cita poden reservar as entradas no teléfono 981 704 300 de 11.00 a 14.00 horas, ou tamén compralas directamente de 16.00 a 18.00 horas na Taquilla do Pazo da Cultura o mesmo día da función. O prezo ordinario da entrada é de 2,5 euros, mentres que o prezo reducido é de 2 euros.
A OFERTA SUPÓN UNHA BAIXA NO PREZO DUN 23 POR CENTO
Mércores 17 de febreiro do 2010
A mesa de contratación do proxecto de 'Execución da remodelación do Mercado Municipal' de Carballo vén de realizar -nunha xuntanza que tivo lugar ás 12.00 horas- a proposta para a adxudicación provisional da obra, que recaería na empresa carballesa Decoraciones J. Bello. A oferta supón unha baixa dun 23 por cento sobre o prezo de adxudicación, polo que se pasa dun orzamento de 2.443.436,78 euros a un de 1.881.446,33 euros. O prazo previsto para o desenvolvemento dos traballos tamén ten sufrido unha notable redución, pasándose de 16 a 10 meses. Así mesmo, Decoraciones J. Bello ofrece melloras adicionais na súa proposta, sen coste algún, por un importe de 265.042,6 euros. O Concelleiro de Urbanismo, José Antonio Viña, espera que a sinatura do contrato, unha vez superados os trámites administrativos, poida producirse na segunda quincena de marzo.
OBRAS E SERVIZOS
Martes 16 de febreiro do 2010
Entre o 1 e o 31 de xaneiro de 2010 o Concello, a través da Alcaldía, ten recibido un total de 187 avisos de veciños e veciñas para realizar servizos de mantemento e arranxos en todo o territorio municipal, unha cifra que supón un incremento de 43 respecto do mesmo mes de 2009. A Brigada de Obras é a encargada de xestionar estas peticións, que na súa maioría (con 107 chamadas) refírense a substitucións e reparacións no alumeado público. Dende o ano 2008 este servizo non ten deixado de medrar, pasándose de 75 avisos en xaneiro dese ano, a 85 en 2009 e aos 107 de 2010. As demandas veciñais tamén se centran nos sinais de tráfico; nos servizos de auga, luz, saneamento ou teléfono; en Carballo Limpo; nos equipamentos dos edificios municipais; na limpeza de espazos públicos ou na mellora da rede viaria. Os veciños e veciñas poden realizar as súas peticións ou demandas no teléfono 981 704 700.
ASISTIRÁ Á FINAL ESTATAL O 25 DE FEBREIRO EN MADRID
Martes 16 de febreiro do 2010
O Concello de Carballo, a través do proxecto 'Bergantiños: pasado e presente', impulsado polo Centro de Dinamización da Sociedade da Información situado no Telecentro do Pazo da Cultura, ten resultado gañador do 'II Concurso Maiores cON iniciativa' organizado pola fundación Fundetec e que conta co apoio da Xunta a través da Secretaría Xeral de Modernización e Innovación Tecnolóxica. A iniciativa consiste nun blog elaborado por persoas maiores que reflicten as súa vivencias recollendo a historia da comarca filtrada pola súa experiencia. O proxecto ten sido seleccionado entre os tres mellores de toda Galicia, polo que os seus representantes acudirán a Madrid o 25 de febreiro para competir na convocatoria a nivel nacional, da que sairá un único galardoado. Os outros concellos que resultaron agraciados con Carballo foron: Ribadeo, con 'Memoria de Muller'; e Allariz con 'As herbas medicinais en Allariz: unha historia de recuperación e empoderamento feminina'.
ENTREGA DE PREMIOS O MARTES 16 DE FEBREIRO
Luns 15 de febreiro do 2010
Un total de 10 iniciativas destinadas a fomentar o uso das Novas Tecnoloxías entre as persoas maiores de Galicia concorrerán á final autonómica do II Concurso Maiores con Iniciativa, organizado por Fundetec para recoñecer o esforzo dos axentes sociais que se preocupan por fomentar a inclusión deste colectivo na Sociedade da Información, así como a propia implicación das persoas maiores participantes. O Centro de Dinamización de Carballo ten sido seleccionado coa proposta 'Bergantiños: pasado e presente', na que maiores do municipio recolleron os seus recordos e vivencias nun blog. Das 16 iniciativas presentadas sairán tres gañadoras, e tanto os dinamizadores/as como todas e cada unha das persoas maiores que participaron nelas recibirán un orixinal trofeo tecnolóxico. Os tres gañadores autonómicos pasarán á final nacional do Concurso, da que sairá un único galardoado.
O ANTROIDO DESPÍDESE CO ENTERRO DA SARDIÑA
Luns 15 de febreiro do 2010
O Concurso e Desfile de Disfraces Comparsas e Carrozas do Antroido de Carballo 2010 repartiu máis de 6.000 euros en premios e subvencións nunha convocatoria moi concorrida que encheu de veciños e veciñas e de concursantes chegados de toda a comarca as rúas máis céntricas da capital municipal. O frío non arredou aos participantes, que fixeron gala de bo humor, simpatía, orixinalidade e creatividade durante máis de dúas horas nas diferentes categorías. Os primeiros premios recaeron en categoría infantil: en comparsas en 'Anos 60 contra anos 80'; en disfraces de grupo, gañaron 'Pan de Carballo'; e en individual, 'A galiña poñedora'. En categoría de adultos gañaron: en individual, 'A Lechuza'; en parellas 'Corazóns de San Valentín; en grupos 'Bob Esponxa'; en comparsas 'Soldadiños de plástico'; e, por último, en carrozas 'Festa fin de curso' (na imaxe). O premio especial 'Choqueiro de Bergantiños' foi a parar a 'Dorinda e Antón. Mercadoría a un patacón'.
NOVA SINALIZACIÓN HORIZONTAL
Venres 12 de febreiro do 2010
O Concello de Carballo, a través da Concellaría de Seguridade e Tráfico que dirixe Benedito Viña, informa de que dende o xoves 11 de febreiro estanse colocando nun total de seis puntos da capital municipal novas sinalizacións de 'Perigo. Zona Escolar'. Esta actuación forma parte do Plan de mellora de seguridade viaria nos colexios, e está previsto que os novos sinais horizontais -triangulares, de material termoplástico e fixados ao firme das rúas- estean completamente instalados o sábado 13 de febreiro. As rúas que disporán desta nova sinalización son: a Carballo Calero, no entorno do CEIP Bergantiños; a Desiderio Varela, no entorno da Ludoteca Municipal; a Fotógrafo Xosé Vidal, no entorno do CEIP Xesús San Luis Romero; a Vila de Noia, no entorno do CEIP Fogar (na imaxe); a Avenida de Bergantiños, no entorno do IES Alfredo Brañas; e a rúa Muíño, no entorno da Escola Infantil 'As Landras'.
CONTINÚA ABERTO O PRAZO DE INSCRICIÓN PARA O CONCURSO
Xoves 11 de febreiro do 2010
O Antroido de Carballo principia o venres 12 de febreiro cunha variada oferta de actividades para o público de todas as idades. Os máis pequenos poderán elaborar diferentes elementos para disfrazarse no obradoiro que terá lugar na Ludoteca Municipal a partires das 18.00 horas. E tamén pola tarde, a partir das 19.30 horas e ata a 1.00, haberá ambientación a cargo da Charanga Os Chinchorros, que achegará a música festiva ás principais prazas e rúas da capital municipal. O sábado 13 os nenos e nenas terán a súa propia festa de disfraces con música, animadores, xogos, cancións e baile: de 18.00 a 20.00 horas na Praza do Concello. E o domingo chegan os pratos fortes: o Concurso e Desfile de Disfraces, Comparsas e Carrozas, para o que aínda segue aberto o prazo de inscrición. E o baile para maiores na Praza do Concello coa orquestra Trebol a partires das 20.30 horas.
NON SE REXISTROU NINGÚN PEÓN FERIDO NESTE PERÍODO
Xoves 11 de febreiro do 2010
A Concellaría de Seguridade e Tráfico que dirixe Benedito Viña fai público o balance da actividade desenvolvida polos servizos da Policía Local e Protección Civil ao longo do mes de xaneiro. O informe indica que se teñen rexistrado 15 accidentes de circulación con sete feridos: cinco condutores (catro deles de motos) e dous ocupantes. Porén, a Policía Local subliña o feito de que ningún peón teña resultado ferido neste período. Os servizos de Protección Civil teñen acudido a seis incendios, tanto no municipio coma noutros concellos da comarca: tres deles urbanos (en dúas casas e unha cheminea en colaboración co Parque Comarcal de Bombeiros); e tres rexistrados nuns cables, nun contador e nunha papeleira. Así mesmo, a Policía Local ten acudido no mes de xaneiro a 56 chamadas de veciños e veciñas demandando servizos asistenciais de seguridade cidadá.
CONCELLARÍA DE IGUALDADE E BENESTAR
Martes 9 de febreiro do 2010
O Concello de Carballo, en colaboración coa Xunta de Galicia e a Asociación Mulleralia, ten posto en marcha un Banco do Tempo Municipal, un servizo que funciona dende hai uns meses e que está situado no primeiro andar do Museo de Bergantiños da capital municipal. Un Banco do Tempo é un espazo concibido para impulsar e favorecer os intercambios de tempos entre as persoas, apoiando a cooperación informal entre particulares para o desenvolvemento de diversas actividades nun determinado contorno. Así, unha persoa deposita unas horas de tempo ofrecendo un servizo informal que quere dar e, a cambio, pode pedir tempo a outras persoas para algunhas necesidades súas do día a día. As horas nin se compran, nin se venden, só se intercambian. Os interesados e interesadas en obter máis información poden chamar ao teléfono 622 566 228. O horario de atención das oficinas é de luns a venres de 9.30 a 13.30 horas.
UN TOTAL DE 30 GRAVADOS
Luns 8 de febreiro do 2010
A sala do andar -1 do Pazo da Cultura de Carballo acolle até o 25 de febreiro unha selección de 30 das 219 obras presentadas ao III Premio de Arte Gráfico Internacional Jesús Núñez, prestixioso certame centrado no gravado e organizado pola Deputación da Coruña e que conta coa colaboración da Fundación CIEC (Cento Internacional da Estampa Contemporánea de Betanzos), situada na casa natal de Jesús Núñez, unha das figuras vivas máis importantes do arte galego. A mostra inclúe o primeiro premio e os dous accésits concedidos, que recaeron en tres xilografías. O primeiro, cunha dotación de 6.500 euros, foi a parar a unha madrileña, Eva Satín, con 'Invisible Darkness'; e os dous accésits recaeron en dous autores arxentinos: Alicia Candiani con 'Serie continentes', e Alberto César Lavera con 'Retrospectiva'. A exposición pode visitarse en horario de 18.00 a 21.00 horas.
ENTRE O 11 E O 13 DE FEBREIRO
Venres 5 de febreiro do 2010
O Grupo de Acción Costeira Costa da Morte (GAC3), do que o Concello de Carballo forma parte, informa de que durante os próximos días realizará unha serie de sesións informativas destinadas aos posibles promotores, axentes sociais, público en xeral e interesados e interesadas no programa de axudas establecidas ao abeiro do Eixe 4 do Fondo Europeo de Pesca, centrado no desenvolvemento sostible das zonas pesqueiras a través do progreso local e a reestruturación da actividade. Hai que lembrar que o GAC3 está formado polos concellos de A Laracha, Malpica, Ponteceso, Cabana, Laxe, Vimianzo, Camariñas e Muxía, ademais de Carballo. As sesións desenvolveranse os días 11, 12 e 13 de febreiro nas localidades de Camariñas, Cabana e Malpica, respectivamente.
.jpg)