PROXECTOS
Martes 9 de setembro do 2008
Dende primeiros deste mes de setembro os operarios xa están realizando os movementos de terras necesarios para emprender os traballos de construción do futuro centro de día da praza de Vigo. As novas instalacións estarán situadas nuns terreos anexos á actual residencia para a terceira idade e complementarán os servizos deste centro de maiores. Estes solares foron cedidos no seu día á Vicepresidencia da Igualdade e do Benestar para que puidera dotar a Carballo deste servizo.
ALMORZOS SAUDABLES
Venres 5 de setembro do 2008
O programa Concilia e ‘Carballo Saudable’ van da man o próximo curso escolar coa posta en marcha dos ‘Almorzos saudables’, unha iniciativa coa que se pretende mellorar a nutrición e a alimentación dos nenos e nenas do municipio, facendo fincapé nunha das comidas máis importantes do día, e á vez unha das máis descoidadas, como é o almorzo. Así, ademais de tentar axudar a compatibilizar a vida laboral e familiar coa acollida dos alumnos dos centros escolares do municipio fóra do horario lectivo, o Concilia tamén pretende este curso reforzar e incidir na modificación dos hábitos alimenticios dos nenos e nenas, introducindo novos alimentos e xeitos de preparación.
CARBALLO SAUDABLE
Venres 5 de setembro do 2008
A partires do próximo 15 de setembro as mulleres do municipio de Carballo poderán contar cun programa específico destinado a coidar a súa condición física e mental a través das ‘Xornadas de Saúde para Mulleres’. Mediante varios cursiños e charlas, e dentro do programa ‘Carballo Saudable’, as beneficiarias poderán reflexionar sobre os prexuízos para o seu benestar e tentar atopar os mecanismos para combater estas situacións con actividades destinadas a educar sobre a saúde mental, a saúde no fogar, a saúde sexual e afectiva ou incluso con clases de preparación para a educación maternal.
DESENVOLVEMENTO SOSTIBLE
Venres 5 de setembro do 2008
Esta semana o Proxecto Forum Carballo recibiu no Ministerio de Administracións Públicas en Madrid a súa presentación definitiva, quedando xa pechados todos os detalles desta iniciativa de dinamización socioeconómica e sostible que permitirá rematar o complexo da Casa dos Oficios no barrio da Milagrosa, ademais de impulsar outras actuacións. Finalmente, o proxecto suporá unha inversión total de 4.658.185 euros -que se dividirá en catro anualidades entre 2008 e 2011- para a que os fondos europeos Feder aportarán o 70 por cento (3.260.729 euros) e o Concello de Carballo o 30 por cento (1.397.455 euros).
OBRAS
Xoves 4 de setembro do 2008
Ao longo desta semana comezaron as obras do proxecto incluído no Plan de Obras e Servizos (POS) de 2008 que consiste no asfaltado e acondicionamento dunha pista que conecta as parroquias de Artes e Rus. Dende a Concellaría de Obras que dirixe Luís Lamas anuncian que tamén está previsto que hoxe -4 de setembro- principien os traballos de acondicionamento dunha pista en Cances, tamén con cargo ao POS da Deputación provincial.
MEDIO AMBIENTE
Xoves 4 de setembro do 2008
O Concello carballés, a través da Concellaría de Medio Ambiente que dirixe José Antonio Viña, pon en marcha unha iniciativa que pretende educar na sustentabilidade e no coidado da natureza coa organización de varios circuítos experimentais e obradoiros educativos dirixidos para toda a cidadanía. O sábado 6 de setembro comezan estas actividades, que a partir das 11.00 horas -e levadas a cabo pola empresa 'Ciencia divertida'- encherán a Praza do Concello de información sobre a prevención da seca, o cambio climático, a reciclaxe, as enerxías renovables ou o desenvolvemento sostible.
POBOACIÓN
Mércores 3 de setembro do 2008
O Concello de Carballo xa sobrepasou os 31.000 habitantes, segundo os datos proporcionados polo Padrón municipal. Dende o 2 de setembro de 2008 o municipio supera a cifra dos 31.002 veciños e veciñas. Aínda que esta cifra está suxeita a fluctuacións e é un dato provisional á espera das actualizacións das altas e baixas do Padrón, o municipio amosa unha tendencia á alza no incremento poboacional, unha tendencia consolidada no Concello dende hai uns anos.
NOVAS TECNOLOXÍAS
Mércores 3 de setembro do 2008
O Goberno local acaba de contratar o subministro e instalación dun equipamento de telecomunicacións para a colocación dun transmisor de Televisión Dixital Terrestre (TDT) no lugar de San Paio -en Entrecruces- co obxectivo de paliar os problemas de recepción nesta zona do Concello. Pola súa orografía esta área é un dos puntos negros do municipio, non só no que re refire ao sinal dixital, senón tamén analóxico. A instalación deste transmisor xa principiou ao longo desta semana, e o Concello espera que as deficiencias estean corrixidas a principios do mes de outubro, cando o repetidor estará operativo.
DEPORTES
Martes 2 de setembro do 2008
Ata doce equipos procedentes de diferentes puntos de España e Portugal disputan esta fin de semana -entre o venres 5 e o sábado 6 de setembro- o 'V Torneo Internacional de Balonmán Concello de Carballo'. Os equipos das categorías cadete feminino e infantil, cadete e xuvenil masculino de clubs tan prestixiosos como o ABC de Braga ou o Ademar de León convivirán durante dous días cos equipos locais das Escolas de Xiria.
SANIDADE
Luns 1 de setembro do 2008
O Centro de Saúde de Carballo amplía o seu servizo coa implantación dente as tres da tarde dos venres ata as oito da mañá dos luns do servizo do Punto de Atención Continuada (PAC), para facilitar que os veciños poidan contar con atención sanitaria ininterrompida durante as fins de semana. Así o acaba de confirmar a Xerencia de Atención Primaria da Coruña á Concellaría de Sanidade que dirixe Lourdes Rey, aínda que o servizo xa comezou a xestionarse ao longo do pasado mes de agosto.
XUNTA DE GOBERNO LOCAL
Luns 1 de setembro do 2008
A Xunta de Goberno Local carballesa deu o 1 de setembro o visto bo ao expediente de contratación que rexerá a adxudicación da ‘Elaboración do estudo director para a mellora de abastecemento no termino municipal de Carballo’, que analizará en profundidade o sistema de suministro de auga do Concello, e que tentará atopar o xeito de mellorar este servizo. Con esta medida, o Concello espera adiantarse aos posibles problemas que poderían xurdir no futuro neste ámbito, debido ao forte crecemento que a capital municipal está a experimentar e ás necesidades das diferentes parroquias.
PECHE DO VERÁN CULTURAL 2008
Venres 29 de agosto do 2008
A programación do Verán Cultural 2008 de Carballo chega hoxe ao seu peche coa celebración do xa habitual Festival de Música e Baile Tradicional no que as agrupacións do municipio teñen un importante papel, ocupando a Praza do Concello a partir das 22.00 horas. Pero antes da chegada desta fin de festa, a Concellaría de Cultura encheu as tardes e noites de xullo e agosto coa posta en marcha de numerosas actividades, cunha selección de propostas dos máis variados estilos.