CARBALLO SAUDABLE
Venres 8 de agosto do 2008
O areal de Razo acolle este domingo 10 de agosto un torneo de volei-praia enmarcado dentro das actividades de ‘En vacacións móvete’, un programa dirixido especialmente aos rapaces e rapazas de entre 14 e 18 anos que pretende facer do deporte unha práctica habitual entre a mocidade, poñendo en marcha iniciativas relacionadas coa natureza. A cita será no areal a partires das 11.00 horas.
VERÁN CULTURAL
Venres 8 de agosto do 2008
A música de raíz e o rock progresivo son algunhas das influencias de Brath, unha agrupación que leva máis de vintesete anos de carreira e que o domingo 10 de agosto presenta na Praza do Concello de Carballo o seu último traballo, ‘Ás portas de Lug’. A partir das 22.30 horas, Brath tentará transportar ao público carballés a través da historia, a música e a mitoloxía galegas cos característicos sons incluídos no seu último álbum, pero tamén retrocedendo ata ‘O latexo de fogo’, a súa anterior proposta, e facendo unha retrospectiva pola súa dilatada traxectoria.
VERÁN CULTURAL
Xoves 7 de agosto do 2008
O hip-hop, o new style e a danza moderna. Son algúns dos estilos que poderán verse o venres 8 de agosto de man da compañía galega As Dríadas, que presenta o seu espectáculo ‘In-nova’. A fusión de diversos bailes e a liberdade e espontaneidade dos integrantes deste elenco marcan este show que nace baixo o lema de ‘Únete nós!’. A partires das 20.00 horas o Xardín Municipal será o escenario para a presentación desta aposta especialmente dedicada ao público máis novo.
RECEPCIÓN NO CONCELLO
Xoves 7 de agosto do 2008
O Alcalde de Carballo, Evencio Ferrero, e a presidenta do Parlamento cantonal de Xenebra, a cormelana Dolores Cruz, estreitaron os vencellos que existen entre os dous territorios tras unha visita institucional celebrada no concello. Durante esta cita, Dolores Cruz resaltou a situación de respecto que viven os galegos e bergantiñáns que traballan na emigración en Xenebra; e Evencio Ferrero subliñou a importancia de que persoeiros da Costa da Morte acaden postos de responsabilidade nun país como Suiza. Con esta primeira visita oficial da presidenta do Parlamento cantonal, o Concello carballés achégase aínda máis a un territorio no que viven e traballan moitos veciños do municipio.
URBANISMO
Mércores 6 de agosto do 2008
A unanimidade presidiu as dúas reunións que mantiveron esta semana os integrantes da Comisión de Urbanismo do Concello de Carballo, que estiveron analizando as alegacións e propostas para a zona rural do municipio dentro da revisión do Plan Xeral de Ordenación Municipal (PXOM). O exame afecta aos 300 núcleos rurais do Concello, aínda que a Comisión -da que forman parte representantes dos catro grupos políticos da corporación- detense só nos casos que supoñen algún tipo de dúbida.
SANIDADE
Martes 5 de agosto do 2008
O Concello de Carballo, o seu servizo de Protección Civil e o Centro de Transfusión de Galicia (CTG) poñen en marcha unha iniciativa, enmarcada dentro de ‘Carballo solidario’, que ten como obxectivo promover a participación dos veciños e veciñas nas campañas de doazón de sangue. Para facilitar a colaboración dos cidadáns, a unidade móbil do CTG estará estacionada na Praza do Concello o mércores 6 e o xoves 7 de agosto en horario de 10.00 a 14.00 horas, e de 16.00 a 21.00 horas, ámbolos dous días.
SUBVENCIÓNS
Martes 5 de agosto do 2008
O Concello de Carballo acaba de recibir axudas por parte da Consellería de Presidencia da Xunta que permitirán reforzar o servizo de Protección Civil do municipio. Así, a agrupación, que conta cun total de quince compoñentes, recibirá 5.705 euros -para a posta en marcha e o desenvolvemento do servizo-, ademais de doce novos vestiarios para socorrista masculino; cinco para socorrista feminino; cinco xogos de bandeiras; seis floppys -ou flotadores de rescate-; e un desfibrilador.
CULTURA
Luns 4 de agosto do 2008
Con motivo da campaña de fomento da lectura ‘Máis libros, máis libres’ que está desenvolvendo a Consellería de Cultura da Xunta, a praia carballesa de Razo acolle o martes 5 de agosto unha acción promocional itinerante que está visitando as principais cidades galegas. Así, un autobús percorrerá as proximidades do areal desenvolvendo actividades para incentivar o hábito da lectura, especialmente entre os máis cativos. A iniciativa desenvolverase entre as 12.00 e as 14.00 horas pola mañá, e entre as 16.00 e as 20.00 horas pola tarde.
VERÁN CULTURAL
Venres 1 de agosto do 2008
A programación do Verán Cultural do Concello de Carballo continúa este venres 1 de agosto coa actuación de Lipan & Company, unha compañía de maxia que presenta o seu espectáculo ‘Traspasando fronteiras’. A Praza do Concello acolle, a partir das 22.30 horas, un show no que teñen cabida a imaxe, a luz, o son, o teatro ou incluso a danza.
URBANISMO
Venres 1 de agosto do 2008
A xunta de compensación do polígono 19 da capital municipal carballesa acaba de facer entrega da urbanización desta área situada no entorno da estrada de Razo. Esta actuación implica a creación de oito novas rúas que xa contan con alumeado público, mobiliario urbano e todo tipo de servizos. As vías están abertas ao tráfico dende hoxe -1 de agosto-, cando o Alcalde, Evencio Ferrero; o tenente de Alcalde, José Antonio Viña; o Concelleiro de Obras, Luís Lamas; e Jesús Lamas, xerente do Grupo Riotorto, cortaron a cinta inaugural.
EMIGRACIÓN
Xoves 31 de xullo do 2008
O Concello de Carballo e o Goberno de Uruguai estreitan as súas relacións coa recepción por parte do Alcalde, Evencio Ferrero, do representante nacional do Parlamento do Goberno de Uruguai e membro da Comisión de Defensa deste país, Luis Rosadilla Pereira. A cita é o venres 1 de agosto a partires das 20.30 horas e está previsto que numerosos representantes do colectivo de uruguaios no municipio e na comarca de Bergantiños asistan a este acto de confraternidade que terá lugar na Casa do Concello.
MEDIO AMBIENTE
Mércores 30 de xullo do 2008
O Concello carballés, a través da Concellaría de Medio Ambiente que dirixe José Antonio Viña, pon en marcha unha iniciativa que pretende educar na sustentabilidade e no coidado da natureza coa organización de varios circuítos experimentais e obradoiros educativos dirixidos para toda a cidadanía, sen límite de idades. As actividades -organizadas pola empresa 'Ciencia divertida’- pretenden que os cidadáns tomen conciencia da situación e problemática medioambiental, buscando a súa participación e fomentando actitudes responsables.
.jpg)
