MEDIO AMBIENTE
Martes 5 de xuño do 2007
Como xa ocorrera hai un ano, 32 alumnos de ASPABER participaron este 5 de xuño, Día Mundial do Medio Ambiente, nunha xornada de limpeza da praia de Razo. Mañá mércores continuará a limpeza no areal de Baldaio, guiada por catro monitores que acompañaron ao alumnado en todo momento durante esta xornada. A praia de Razo presenta xa un bo estado para o comezo da temporada de praias, prevista para o vindeiro sábado 9 de xuño.
NOVAS TECNOLOXÍAS
Martes 5 de xuño do 2007
Carballo PortaAberta, o modelo de administración dixital que pretende que a cidadanía poda facer certos trámites ou solicitudes desde a súa casa, traballo, etc., de forma que se evite o desprazamento á Casa Consistorial, superou as cen altas o día da súa posta en marcha, polo que os cen primeiros en darse de alta no servizo recibirán un Pendrive de 1Gb. A partir de agora, todos aqueles que se dean de alta no mes de xuño, entrarán no sorteo dunha PDA Phone HTC P3600 (ou modelo similar), para poder acceder ó Concello Online desde onde se queira (non inclúe a alta no servizo movil). O sorteo farase no mes de xullo e a cada usuario se lle asignará o seu número de solicitude. O persoal do Concello de Carballo non poderá participar nesta promoción.
SERVIZOS
Luns 4 de xuño do 2007
A Consellería de Medio Rural está a proceder estes días ao acondicionamento de varias pistas do concello no rural. Son máis dunha decena os camiños que están a ser acondicionados e, nesta mesma liña de actuación, o Concello de Carballo está a redactar un novo proxecto para remitir á propia Consellería e actuar en máis lugares do municipio.
OBRAS
Luns 4 de xuño do 2007
A mesa de contratación do Concello de Carballo ven de adxudicar a terceira fase do paseo do Río Anllóns, entre outras obras, correspondente ao tramo que vai do Parque do Anllóns até o Muíño do Quinto. Na actualidade estanse a culminar os últimos traballos da primeira fase, que vai desde a Ponte da Milagrosa até O Bosque, e xa se adxudicou a segunda fase, que chega até a Ponte de Bértoa desde este último lugar.
NOVAS TECNOLOXÍAS
Luns 4 de xuño do 2007
Este luns, 4 de xuño, comeza a funcionar Carballo PortaAberta, un modelo de administración dixital, financiado nun 45% pola Consellería de Innovación e Industria da Xunta de Galicia, que pretende que a cidadanía poda facer certos trámites ou solicitudes desde a súa casa, traballo, etc., de forma que se evite o desprazamento á Casa Consistorial. Carballo PortaAberta enmárcase no anteproxecto de Lei sobre Administración Electrónica que se está a tramitar no Congreso dos Diputados e que garantirá á cidadanía o dereito a facer os trámites mediante os novos medios de comunicación. O Concello de Carballo adiántase unha vez máis e lánzase a iniciar a prestación de servizos telemáticos cumprindo gran parte dos obxectivos e requisitos do citado anteproxecto.
CULTURA
Venres 1 de xuño do 2007
Os integrantes do Coro do Conservatorio de Música de Carballo serán os encargados de pechar o ciclo Xoves Intérpretes, incluído no Programa das Letras do Concello de Carballo, e que se ven desenvolvendo no Pazo da Cultura desde o pasado martes. O último dos concertos terá lugar este venres, 1 de xuño, a partir das 19,00 horas no Pazo da Cultura.
PROGRAMACIÓN DEPORTIVA
Venres 1 de xuño do 2007
Rematado o prazo de solicitude para participar no programa Campus de Fútbol 2007, xestionado pola Deputación da Coruña, o Concello de Carballo foi incluído nesta actividade para a que se lle adxudicaron 5 prazas. As datas nas que se desenvolverá a actividade son do 15 ao 21 de xullo de 2007, abríndose o prazo de inscrición para achegar as solicitudes até o 25 de xuño de 2007. En canto aos Campamentos Deportivos, o Concello de Carballo conta con 30 prazas adxudicadas. As datas nas que se desenvolverá a actividade son do 8 ao 14 de xullo de 2007, sendo o prazo de inscrición para achegar as solicitudes até o 18 de xuño de 2007.
SERVIZOS
Xoves 31 de maio do 2007
O Concello de Carballo está a proceder á colocación dos primeiros dispositivos con elementos de ximnasia e mantemento para maiores no paseo do río Anllóns, correspondente á segunda fase da actuación que vai até Bértoa. A actuación enmárcase dentro da posta en valor do río e facilitará un novo servizo aos maiores da localidade.
PROGRAMACIÓN DEPORTIVA
Xoves 31 de maio do 2007
O Padroado Deportivo Municipal de Carballo e o Servizo Provincial de Deportes da Xunta de Galicia, en colaboración coas Escolas de Balonman XIRIA de Carballo, organizan a fase final provincial de Balonmán de Deporte en Idade Escolar en categorías alevín e benxamín. A competición desenvolverase no Pavillón Vila de Noia o vindeiro sábado, 2 de xuño, desde ás 10,30 até as 19,30, hora na que se fará a entrega de medallas e trofeos.
SERVIZOS SOCIAIS
Xoves 31 de maio do 2007
O Ministerio de Trabajo y Asuntos Sociales, a través do Instituto de Mayores y Servicios Sociales -IMSERSO- ven de convocar o programa de vacacións para maiores para a tempada 2007/2008. A Vicepresidencia da Igualdade e do Benestar da Xunta de Galicia está a achegar, para aquelas persoas que non foron o ano pasado ou non recibiron a actualización, as solicitudes do programa. Unha vez cumplimentadas deberán remitirse ao Apartado de Correos nº 10140. 28080. Madrid ou a través da web doIMSERSO. O prazo remata o 30 de xuño de 2007.
NOVAS TECNOLOXÍAS
Mércores 30 de maio do 2007
A Rede de Dinamización da Sociedade da Información ven de por en marcha un dos tres obradoiros que se prolongarán durante as vindeiras semanas no Concello de Carballo e no que participará un grupo de usuarias do proxecto Equal, en plan de igualdade. As participantes do curso poderán achegarse ás novas tecnoloxías iniciándose, en primeiro lugar, na informática, introducíndose seguidamente na Rede de Redes e finalizar creando e aprendendo a xestionar a súa propia conta de correo electrónico.
CULTURA
Mércores 30 de maio do 2007
O escritor Suso de Toro conversará cos lectores e lectoras de Home sen nome este mércores, 30 de maio, a partir das 20.30 horas na Cervexaría San Xoán de Carballo (Rúa de Ourense 8-10). A actividade está enmarcada dentro do programa Literactúa do Concello de Carballo. Home sen nome conta a historia dun vello terminal que é acompañado durante dous días por Nano, encamado no cuarto dun hospital. O vello, un home sen nome, un enigma invadido polas lembranzas, entre o delirio e o soño provocados pola medicación, enunciará o monólogo da súa arrepiante biografía centenaria.
.jpg)
